[美食推介系列] 屯門 置樂 白羊咖啡
屯門地方大，小店又多，要搵食又的確唔難，區內本身都好多大大小小既café，不過講到價錢抵，相信無邊間平得過白羊咖啡。
白羊咖啡有兩間分店，兩間都係屯門，我去既就係置樂呢間。雖然門面幾靚，樓底又高，不過呢佢就幾乎不設堂食，只有吧檯一張，疫情之下僅僅能夠容納二人堂食，慶幸到埗時無人坐緊，先至可以享受堂食。
叫左杯榛子Latte，因為我唔係好受得太濃既咖啡，所以只係嗌左中杯，2字頭既價錢有交易，另加$10有件三文治，類似飛碟咁既。價錢就唔洗講啦，平就梗架喇，而咖啡既質素其實都唔差，幾易入口，唔會好甜，亦唔帶苦味，怕濃咖啡味既人絕對可以試下。至於個飛碟三文治，仲以為會好hae，點知都幾脆口，餡料都好充足，呢個份量作為tea time小食都夠飽，性價比好高。
因為口痕既關係，叫多左件cake，$15既蘋果mousse，感覺幾清新，喜歡食甜品同蛋糕既人要試下，至少唔會有cheesecake個種油膩，又係個句，呢個價錢，呢個質素，性價比好高。
食物: ★★★☆
價錢: ★★★★★
環境: ★★★
服務: ★★★
性價比: ★★★★☆
Search